TVB小说

第57章（第3页）

二宝气忿忿的瞪视多时，没法处置。

洪氏还紧着要问阿巧。

二宝道：“问俚啥嗄！”

遂将前日之事径直说出。

洪氏方着了急，只骂朴斋不知好歹，无端闯祸。

二宝欲令阿虎和小妹姐打话，给些遮羞洋钱，着其领回。

阿虎道：“小妹姐倒勿要紧，我先问声俚自家看。”

遂将阿巧拉过一边，必唧必唧问了好一会。

阿虎笑而覆道：“拨我猜着，俚哚两家头说好来浪，要做夫妻个哉。

洋钱末倒也匆要，等俚爷娘来求亲好哉。”

洪氏大喜道：“价末耐就替我做仔个媒人罢。”

二宝跳起来喝道：“勿局个！

（要勿）面孔个小娘仵，我去认俚阿嫂？”

洪氏呆脸相视，不好作主。

阿虎道：“倪说末，开堂子个老班讨个大姐做家主婆，也无啥勿局。”

二宝大声道：“我勿要囗！”

洪氏不得已，一口许出五十块洋钱，仍令阿虎去和小妹姐打话。

二宝咬牙恨道：“阿哥个人末，生就是流氓坯！

三公子要拿总管个囡仵拨来阿哥，阿要体面！

啥个等勿得，搭个臭大姐做夫妻。”

洪氏听说，虽也喜欢，但恐小妹姐不肯干休；等得阿虎回家，急问如何。

阿虎摇头道：“勿成功！

小妹姐说：‘耐个囡仵末面孔生得标致点，做个小姐，俚也一样是人家囡仵呀，就不过面孔勿标致，做仔大姐。

做小姐个末开宝要几花，落镶要几花；俚大姐也一样个（口宛）。

拨耐倪子团仔几个月，故歇说五十块洋钱，阿是来里拗空？’”

洪氏着实惶惧，眼望二宝候其主意。

二宝道：“等俚爷娘来，看光景。”

洪氏胆小，忐忑不宁。

转瞬之间，等了三日，倒是朴斋从南京遗回家来。

洪氏一见，极口埋冤。

二宝跺脚道：“无（女每），让俚说仔了囗！”

朴斋放下铺盖，说道：“史三公子匆来个哉。

我末进个聚宝门，寻到史三公子府浪，门口七八个管家才匆认得。

起先我说寻小王，俚哚理也勿理。

我就说是齐大人差得来，要见三公子，难末请我到门房里，告诉我：三公子上海回来就定仔个亲事，故歇三公子到仔扬州哉，小王末也跟仔去。

十一月二十就来里扬州成亲，要等满仔月转来哚。

阿是匆来个哉。”